മലയാള ചലച്ചിത്ര സംഗീതത്തിന്റെ ചരിത്രവഴികളിൽ അവിസ്മരണീയമായ വസന്തകാലം തീർത്ത പ്രതിഭയാണ് എസ്. ജാനകി. ആറുപതിറ്റാണ്ടിലേറെ നീണ്ട സംഗീതസപര്യയിൽ, ഭാവസാന്ദ്രമായ ശബ്ദംകൊണ്ട് ഓരോ മലയാളി ഹൃദയത്തിലും സമാനതകളില്ലാത്ത ഒരു സ്ഥാനം അവർ സ്വന്തമാക്കി.
​ജാനകിയമ്മയുടെ മലയാള സംഗീതജീവിതത്തിന്റെ പ്രധാന സവിശേഷതകളിൽ ഒന്ന് ശബ്ദസൌകുമാര്യതയാണ്.
​ 1957-ൽ പുറത്തിറങ്ങിയ ‘മിന്നൽ പടയാളി’ എന്ന ചിത്രത്തിലെ ഗാനങ്ങളിലൂടെയാണ് ജാനകിയമ്മ മലയാളത്തിലേക്ക് എത്തുന്നത്. തുടർന്ന് എം.എസ്. ബാബുരാജ്, ജി. ദേവരാജൻ, കെ. രാഘവൻ, ദക്ഷിണാമൂർത്തി, ശ്യാം, ജോൺസൺ, രവീന്ദ്രൻ തുടങ്ങിയ പ്രതിഭകളായ സംഗീതസംവിധായകരുടെ പ്രിയപ്പെട്ട ഗായികയായി അവർ മാറി.

ഒരേസമയം പ്രണയവും വിരഹവും ഭക്തിയും താരാട്ടുപാട്ടും ഒരുപോലെ ആവാഹിക്കാൻ കഴിഞ്ഞതായിരുന്നു ആ ശബ്ദത്തിന്റെ മാന്ത്രികത. കുട്ടിത്തം തുളുമ്പുന്ന ശബ്ദത്തിൽ പാടാനുള്ള അവരുടെ കഴിവ് ഏറെ പ്രശസ്തമാണ്.
‘താമസമെന്തേ വരുവാൻ’, ‘തുമ്പീ വാ തുമ്പക്കുടത്തിൽ’, ‘നാഥാ നീ വരും കാലൊച്ച കേൾക്കുവാൻ’, ‘മൗനസരോവരമാകെ’, ‘ആതിരക്കുളിരുകോരി’, ‘മാനസ മണിവേണുവിൽ,’ ‘ഉണരുണരൂ,’ ‘താനേ തിരിഞ്ഞും മറിഞ്ഞും’, തുടങ്ങി മലയാളികൾ നെഞ്ചിലേറ്റിയ നൂറുകണക്കിന് അനശ്വര ഗാനങ്ങൾ ജാനകിയമ്മയുടേതായിട്ടുണ്ട്.
​

മികച്ച പിന്നണി ഗായികയ്ക്കുള്ള കേരള സംസ്ഥാന ചലച്ചിത്ര പുരസ്കാരം 14 തവണയാണ് ജാനകിയമ്മയെ തേടിയെത്തിയത്. നാല് ദേശീയ പുരസ്കാരങ്ങളിൽ ഒന്നായ ‘ഏറ്റുമാനൂർ അമ്പലത്തിൽ’ (ചിത്രം: ഓളങ്ങൾ) എന്ന ഗാനവും മലയാളത്തിൽ നിന്നുള്ളതായിരുന്നു. അന്യഭാഷാ തനിമ ഒട്ടുമില്ലാതെ, വരികളുടെ അർത്ഥവും ഭാവവും പൂർണ്ണമായി ഉൾക്കൊണ്ട് ജാനകിയമ്മ പാടിയ പാട്ടുകൾ മലയാളി ഉള്ളിടത്തോളംകാലം നിലനിൽക്കും.