സ്പോർട്സ് ആക്ഷൻ ഡ്രാമയുമായി ഡർബി തിയ്യേറ്ററുകളിലേക്ക്

സ്പോർട്സ് ആക്ഷൻ ഡ്രാമ ചിത്രം ഡർബി മാർച്ച് 27 ന് തിയറ്ററുകളിൽ പ്രദർശനത്തിന് എത്തുന്നു. നവാഗതനായ നിഷാന്ത് സാറ്റു സംവിധാനം ചെയ്യുന്ന ഈ ചിത്രത്തിൽ ഹൃദയത്തിലൂടെയും മറ്റും ശ്രദ്ധേയനായ താരം അശ്വത് ലാലാണ് പ്രധാന വേഷത്തിൽ എത്തുന്നത്. കുതിരപ്പന്തയത്തിന്റെ പശ്ചാത്തലത്തിൽ ഒരുങ്ങുന്ന അപൂർവ്വം മലയാള സിനിമകളിൽ ഒന്നാണിത് എന്ന പ്രത്യേകതയും ചിത്രത്തിനുണ്ട്. ഒരു ചെറിയ പട്ടണത്തിൽ നിന്ന് കുതിരപ്പന്തയ ലോകത്തേക്കെത്തുന്ന യുവാവിന്റെ പോരാട്ടവും അതിജീവനവുമാണ് സിനിമയുടെ ഇതിവൃത്തം. യുവതാരങ്ങൾ അണിനിരക്കുന്ന ഈ ചിത്രത്തിൽ വിനീത് വിശ്വം, വിജിലേഷ് തുടങ്ങിയവരും ശ്രദ്ധേയമായ വേഷങ്ങൾ കൈകാര്യം ചെയ്യുന്നുണ്ട്. ആക്ഷനും വൈകാരിക നിമിഷങ്ങൾക്കും തുല്യ പ്രാധാന്യം നൽകിക്കൊണ്ടാണ് സിനിമയുടെ തിരക്കഥ ഒരുക്കിയിരിക്കുന്നത്. സ്പോർട്സ് സിനിമകളെ ഇഷ്ടപ്പെടുന്ന യുവാക്കൾക്ക് ഈ ചിത്രം ഒരു പുത്തൻ അനുഭവമായിരിക്കുമെന്നാണ് അണിയറ പ്രവർത്തകർ അവകാശപ്പെടുന്നത്.