രാഷ്ട്രീയ ത്രില്ലറുമായി നിവിൻ പോളി; ‘പ്രതിച്ഛായ’ മാർച്ച് 26 ന് തിയറ്ററുകളിലേക്ക്

ബി. ഉണ്ണികൃഷ്ണൻ സംവിധാനം ചെയ്യുന്ന നിവിൻ പോളി ചിത്രം ‘പ്രതിച്ഛായ’ മാർച്ച് 26 നു തിയ്യേറ്ററുകളിലേക്ക് എത്തുന്നു. ഒരു കംപ്ലീറ്റ് പൊളിറ്റിക്കൽ ത്രില്ലറാണ് പ്രതിച്ഛായ. ചിത്രത്തിൽ കേരള മുഖ്യമന്ത്രിയുടെ പൊളിറ്റിക്കൽ സെക്രട്ടറി അഥവാ എയ്ഡ് ആയിട്ടാണ് നിവിൻ പോളി വേഷമിടുന്നത്. സമകാലിക രാഷ്ട്രീയ സംഭവവികാസങ്ങളെയും അധികാര കേന്ദ്രങ്ങളിലെ ചരടുവലികളെയും ആസ്പദമാക്കിയാണ് സിനിമയുടെ തിരക്കഥ ഒരുക്കിയിരിക്കുന്നത്. നിവിൻ പോളിയെ കൂടാതെ ബാലചന്ദ്രമേനോൻ, ഷറഫുദ്ദീൻ തുടങ്ങിയ പ്രമുഖതാരങ്ങളും ഈ ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. ഒരു നീണ്ട ഇടവേളയ്ക്ക് ശേഷം നിവിൻ പോളിയുടെ ശക്തമായ തിരിച്ചുവരവായിരിക്കും ഈ സിനിമയെന്നാണ് ആരാധകർ പ്രതീക്ഷിക്കുന്നത്. പ്രശസ്ത സംഗീത സംവിധായകൻ സുഷിൻ ശ്യാമാണ് ചിത്രത്തിന് സംഗീതം നൽകുന്നത് എന്ന പ്രത്യേകതയും ഈ സിനിമയ്ക്കുണ്ട്.