ഓൾഗാ പ്രൊഡക്ഷൻസിന്റെ ബാനറിൽ റെജി പ്രോത്താസിസ്, നൈസി റെജി എന്നിവർ ചേർന്ന് നിർമ്മിച്ച് ഷാജി കൈലാസ് സംവിധാനം ചെയ്യുന്ന ഏറ്റവും പുതിയ ചിത്രം ‘വരവ്’ ഷൂട്ടിംഗ് ആരംഭിച്ചു. ജോജു ജോർജ്ജാണ് ചിത്രത്തിൽ നായകനായി എത്തുന്നത്. മലയോര മേഖലയാണ് കഥാപാശ്ചാത്തലം. മൂന്നാറിലാണ് ചിത്രത്തിന്റെ ഷൂട്ടിംഗ് ആദ്യം തുടക്കം കുറിച്ചത്. ചിത്രത്തിന്റെ സ്വിച്ചോൺ കർമ്മം റെജി പ്രോത്താസിസ് നിർവഹിച്ചു. നൈസി റെജി ആദ്യ ക്ലാപ് നല്കി. ഒരു ആക്ഷൻ ത്രില്ലർ മൂവിയാണ് വരവ്. മലയാളത്തിന്റെ പ്രിയ നടി സുകന്യയാണ് മറ്റൊരു പ്രധാന കഥാപാത്രത്തെ അവതരിപ്പിക്കുന്നത്.
മുരളി ഗോപി, അർജുൻ അശോകൻ, വിൻസി അലോഷ്യസ്, സാനിയ ഇയ്യപ്പൻ, ബാബുരാജ്, ബിജു പപ്പൻ, ബോബികുര്യൻ, കോട്ടയം രമേഷ്, അശ്വിൻ കുമാർ, അഭിമന്യു തിലകൻ, ബാലാജി ശർമ്മ, രാധിക രാധാകൃഷണൻ, അസീസ് നെടുമങ്ങാട്, ശ്രീജിത്ത് രവി, ദീപക് പറമ്പോൽ, ചാലി പാലാ എന്നിവരും പ്രധാന കഥാപാത്രങ്ങളായി എത്തുന്നുണ്ട്. എ കെ സാജനാണ് തിരക്കഥ ഒരുക്കുന്നത്. ചിന്താമണി കൊലക്കേസ്, റെഡ് ചില്ലീസ്, ദ്രോണ എന്നീ സിനിമകൾക്ക് തിരക്കഥ ഒരുക്കിയിരിക്കുന്നത് എ കെ സാജനാണ്. ഛായാഗ്രഹണം എസ്. ശരവണൻ, എഡിറ്റിങ് ഷമീർ മുഹമ്മദ്. മൂന്നാർ, മറയൂർ, ഇടുക്കി, തേനി, കാന്തല്ലൂർ എന്നിവിടങ്ങളിലായി ചിത്രീകരണം പുരോഗമിക്കും.
