‘ജയ ജയ ജയ ഹേ ‘ എന്ന സൂപ്പർ ഹിറ്റ് ജനപ്രിയ ചിത്രത്തിന് ശേഷം വിപിൻദാസ് സംവിധാനം ചെയ്ത് പൃഥ്വിരാജ് സുകുമാരനും ബേസിൽ ജോസഫും പ്രധാനകഥാപാത്രങ്ങളായി എത്തുന്ന ‘ഗുരുവായൂരമ്പലനടയിൽ’ ചിത്രത്തിന്റെ ടീസർ പുറത്തിറങ്ങി. കല്യാണവിശേഷങ്ങൾ പങ്കുവയ്ക്കുന്ന രസകരമായ ടീസറാണ് റിലീസായിരിക്കുന്നത്. മെയ് 16 ന് ചിത്രം തിയ്യേറ്ററുകളിൽ പ്രദർശനത്തിന് എത്തും. ഒരു കോമഡി ചിത്രമായിരിക്കും ഗുരുവായൂരമ്പലനടയിൽ.
പല തമാശകളും കോർത്തിണക്കിയ ഒരു കംപ്ളീറ്റ് കോമഡി ചിത്രമാണ് ഗുരുവായൂരമ്പലനടയിൽ. തമിഴിലെ ശ്രദ്ധേയ ഹാസ്യതാരം യോഗി ബാബു ആദ്യമായി അഭിനയിക്കുന്ന മലയാള സിനിമ കൂടിയാണിത്. പൃഥ്വിരാജ് പ്രൊഡക്ഷൻസും ഇ ഫോർ എന്റർടൈമെന്റ്സും ആണ് ചിത്രം റിലീസ് ചെയ്യുന്നത്. പൃഥ്വിരാജ്, ബേസിൽ ജോസഫ്, നിഖില വിമൽ, അനശ്വര രാജൻ, ഇർഷാദ്, ജഗദീഷ്, പി പി കുഞ്ഞികൃഷ്ണൻ, ബൈജു, രേഖ, സിജു സണ്ണി, സഫ്വ്വാൻ, കുഞ്ഞികൃഷ്ണൻ മാസ്റ്റർ, മനോജ് കെ യു, തുടങ്ങിയവരാണ് പ്രധാന അഭിനേതാക്കൾ.
