നവാഗതനായ ജിതിൻ ലാൽ ടൊവിനോ തോമസിനെ നായകനാക്കി സംവിധാനം ചെയ്യുന്ന പാൻ ഇന്ത്യൻ ചിത്രം ‘അജയന്റെ രണ്ടാം മോഷണ’ത്തിൽ ശബ്ദ സാന്നിദ്ധ്യമായി മോഹൻലാലും എത്തുന്നു. ടൊവിനോ ആണ് സോഷ്യൽ മീഡിയയിലൂടെ ഇക്കാര്യം വെളിപ്പെടുത്തിയത്.സെപ്തംബർ 12- ന് ചിത്രം റിലീസ് ചെയ്യാനിരിക്കവേ ആണ് ടൊവിനോ പുതിയ സർപ്രൈസ് പ്രേക്ഷകർക്ക് മുന്നിൽ അവതരിപ്പിച്ചത്. ട്രിപ്പിൾ റോളിൽ ടൊവിനോ എത്തുന്ന ചിത്രം ആണ് ഇതിന്റെ മറ്റൊരു പ്രത്യേകത. എ ആർ എം മാജിക് ഫ്രയിംസിന്റെ ബാനറിൽ ലിസ്റ്റിൻ സ്റ്റീഫനും യുജിഎം മോഷൻ പിക്ചേഴ്സിന്റെ ബാനറിൽ സക്കറിയ തോമസും ചേർന്നാണ് ചിത്രം നിർമ്മിക്കുന്നത്.
മലയാളം, ഹിന്ദി, തമിഴ്, തെലുങ്ക്, കന്നട എന്നീ അഞ്ചുഭാഷകളിൽ ആയാണ് ചിത്രം തിയ്യേറ്ററുകളിൽ എത്തുക. കൃതിക ഷെട്ടി, രോഹിണി, പ്രമോദ് ഷെട്ടി, ഐശ്വര്യ രാജേഷ്, ബേസിൽ ജോസഫ്, ജഗദീഷ്,ഹരീഷ് ഉത്തമൻ, കബീർ സിങ്, ഹരീഷ് പേരടി, എന്നിവർ പ്രധാന കഥാപാത്രങ്ങളായി എത്തുന്നു. സുജിത് നമ്പ്യാരാണ് ചിത്രത്തിന് തിരക്കഥ ഒരുക്കുന്നത്. ഛായാഗ്രഹണം ജോമോൻ ടി ജോൺ, എഡിറ്റിങ് ഷമീർ മുഹമ്മദ്, സംഗീതം ദിബു നൈനാൻ.
