അഭിലാഷ് ജോഷി സംവിധാനം ചെയ്ത് ദുല്‍ഖര്‍ സല്‍മാന്‍ നായകനായി എത്തുന്ന ബിഗ് ബജക്റ്റ് മാസ്സ് എന്‍റര്‍ടെയ്നര്‍ ചിത്രം ‘കിങ് ഓഫ് കൊത്ത’ ആഗസ്ത് 24- നു തിയ്യേറ്ററുകളിലേക്ക്. നാനൂറിലധികം സ്ക്രീനുകളിലായി കേരളത്തിലുടനീളമാണ് കിങ് ഓഫ് കൊത്ത പ്രദര്‍ശനത്തിനെത്തുന്നത്. എതിരാളികള്‍ ഇല്ലാതെ സോളോ റിലീസായി ചിത്രം പ്രദര്‍ശനത്തിനൊരുങ്ങുന്നു.
പ്രേക്ഷകര്‍ പ്രതീക്ഷയോടെ കാത്തിരിക്കുന്ന ചിത്രമാണ് ദുല്‍ഖര്‍ സല്‍മാന്‍ മാസ്സ് ലുക്കില്‍ എത്തുന്ന കിങ് ഓഫ് കൊത്ത. ഓരോ ട്രൈലറും പോസ്റ്ററും പുറത്തിറങ്ങുമ്പോള്‍ മികച്ച പ്രതികരണമാണ് പ്രേക്ഷകരുടെ ഭാഗത്ത് നിന്നും ഉണ്ടാവുന്നത്. പാന്‍ ഇന്ത്യന്‍ ലെവലില്‍ റിലീസ് ആവുന്ന ഈ ചിത്രം ബിഗ് മൂവിയാകുമെന്ന് കിങ് ഓഫ് കൊത്തയുടെ അണിയറ പ്രവര്‍ത്തകര്‍ വിശ്വസിക്കുന്നു. അഭിനയജീവിതത്തില്‍ ദുല്‍ഖര്‍ ഏറെ വെല്ലുവിളികള്‍ നേരിട്ട കഥാപാത്രമാണ് ‘കിങ് കൊത്ത’യില്‍. സീ സ്റ്റുഡിയോസും ദുല്‍ഖര്‍ സല്‍മാന്‍റെ വേഫാറെര്‍ ഫിലിംസും ചേര്‍ന്നാണ് ചിത്രം നിര്‍മ്മിക്കുന്നത്.
ചിത്രത്തിന്റെ ടീസറും പോസ്റ്ററും ഒരുപോലെ വൈറലായപ്പോള്‍ ‘കലാപക്കാര’ എന്ന ഗാനവും പ്രേക്ഷകര്‍ ഏറ്റെടുത്തു കഴിഞ്ഞു. ഛായാഗ്രഹണം നിമീഷ് രവിയും സംഗീതം ജേക്സ് ബിജോയിയും ഷാന്‍ റഹ്മാനും നിര്‍വഹിക്കുന്നു. ചെമ്പന്‍ വിനോദ്, ഐശ്വര്യ ലക്ഷ്മി, അനിഖ സുരേന്ദ്രന്‍, ഷമ്മി തിലകന്‍, ഗോകുല്‍ സുരേഷ്, നൈല ഉഷ, ശാന്തി കൃഷ്ണ, വടചെന്നൈ ശരണ്‍, പ്രസന്ന, ഷബീര്‍ കല്ലറയ്ക്കല്‍ തുടങ്ങിയവരാണ് ചിത്രത്തിലെ മറ്റ് താരങ്ങള്‍.
