മലയാള സിനിമയിലെ എഡിറ്റര്‍ കെ പി ഹരിഹരപുത്രന്‍ (79) അന്തരിച്ചു. മലയാളത്തിലെ സൂപ്പര്‍ ഹിറ്റ് സിനിമകള്‍ക്ക് എഡിറ്റിങ് നിര്‍വഹിച്ച വ്യക്തി കൂടിയാണ് കെ പി ഹരിഹരപുത്രന്‍. തിരുവനന്തപുരത്തുള്ള വീട്ടില്‍ വെച്ചായിരുന്നു അന്ത്യം. നിരവധി പ്രമുഖര്‍ ആദരാഞ്ജലികള്‍ നേര്‍ന്ന് കൊണ്ട് രംഗത്തെത്തി. ‘പ്രിയപ്പെട്ട ഹരിഹരപുത്രന്‍ സാറിന് ആദരാഞ്ജലികള്‍. മലയാളത്തില്‍ പ്രശസ്തമായ ഒരുപാട് ചിത്രങ്ങളുടെ ഫിലിം എഡിറ്റര്‍ ആയിരുന്ന പുത്രന്‍ സാറിന്‍റെ ദേഹവിയോഗത്തില്‍ പ്രാര്‍ത്ഥനയോടെ’- മധുപാല്‍ കുറിച്ചിട്ടു. മലയാള സിനിമയില്‍ അദ്ദേഹം അസിസ്റ്റന്‍റ് എഡിറ്റര്‍, അസോസിയേറ്റ് എഡിറ്റര്‍ എഡിറ്റര്‍ എന്നീ മേഖലകളില്‍ പ്രവര്‍ത്തിച്ചിരുന്നു. ‘വിലയ്ക്കുവാങ്ങിയ വാങ്ങിയ വീണ’ എന്ന ചിത്രത്തിലൂടെ അസിസ്റ്റന്‍റ് എഡിറ്ററായി തുടക്കം.
കെ ശങ്കുണ്ണിയുടെ അസോസിയേറ്റ് എഡിറ്റര്‍ ആയി വിത്തുകള്‍ എന്ന ചിത്രത്തിലും ജോലി ചെയ്തു. സ്വതന്ത്ര്യ എഡിറ്ററായി ആദ്യമായി എത്തുന്നത് 1979- ല്‍ പുറത്തിറങ്ങിയ കള്ളിയങ്കാട്ട് നീലി എന്ന ചിത്രത്തിലൂടെയാണ്. പിന്നീട് വിവാഹിതരെ ഇതിലെ, സര്‍വകലാശാല, തലമുറ, ചകോരം, നഗരങ്ങളില്‍ ചെന്നു രാപ്പാര്‍ക്കാം, അനിയന്‍ ബാവ ചേട്ടന്‍ ബാവ, സുഖമോ ദേവി, ഏപ്രില്‍ 18, ശേഷക്രിയ, പഞ്ചാബി ഹൌസ്, ശ്രീകൃഷ്ണപുരത്തെ നക്ഷത്രത്തിളക്കം, വടക്കുംനാഥന്‍, ചതിക്കാത്ത ചന്ദു, ചോക്കളേറ്റ്, പാണ്ടിപ്പട, തൊമ്മനും മക്കളും, സൂപ്പര്‍മാന്‍, ദ കാര്‍, തലമുറ, തുടങ്ങി നിരവധി സൂപ്പര്‍ ഹിറ്റ് സിനിമകളുടെ എഡിറ്ററായിരുന്നു കെ പി ഹരിഹരപുത്രന്‍. അവസാനമായി എഡിറ്റ് ചെയ്ത സിനിമ സോഹന്‍ ലാല്‍ സംവിധാനം ചെയ്ത ദ ഗ്രേയ്റ്റ് ആണ്. സംസ്കാരം രണ്ട് മണിക്ക് തൈക്കാട് ശാന്തി കവാടത്തില്‍ വെച്ച് നടക്കും.
