ആവേശക്കൊടുമുടിയിൽ ആരാധകർ, നിറഞ്ഞുകവിയുന്ന തിയ്യേറ്ററുകൾ; വിജയക്കൊടി പാറിച്ച് എമ്പുരാൻ പ്രദർശനം തുടരുന്നു

തിയ്യേറ്ററുകളിൽ ആരാധകരുടെ ആവേശക്കടലിളക്കമാണ് മാർച്ച് 27- മുതൽ. ഖുറേഷി അബ്രഹാമും സയീദ് മസൂദും നിറഞ്ഞുനിൽക്കുന്ന ദിവസങ്ങളാണിനി. മലയാളത്തിലെ ബ്രഹ്മാണ്ഡ ചിത്രമായി എമ്പുരാൻ വാഴ്ത്തപ്പെടുമ്പോൾ നായകതുല്യമാർന്ന കഥാപാത്രങ്ങളിൽ പ്രേക്ഷകർ തിരഞ്ഞത് ഒരേയൊരു വില്ലനെയായിരുന്നു. ക്ലൈമാക്സ് വരെ പ്രേക്ഷകരെ അക്കാര്യത്തിൽ മുൾമുനയിൽ നിർത്തിയെന്ന് അവകാശപ്പെടുകയാണ് സിനിമകണ്ടിറങ്ങിയ ഓരോരുത്തരും. നിരവധി ചലച്ചിത്ര അഭിനേതാക്കളും സിനിമകാണാൻ തിയ്യേറ്ററുകളിലേക്ക് എത്തി. കൊച്ചിയിലെ കവിത തിയ്യേറ്ററിലാണ് മോഹൻലാൽ, പൃഥ്വിരാജ്, ഇന്ദ്രജിത്ത്, മഞ്ജു വാര്യർ, ടോവിനോ തോമസ്, തുടങ്ങിയവർ ഫസ്റ്റ് ഷോയ്ക്ക് എത്തിയത്. ഇന്ത്യയിൽ മാത്രമല്ല, ലോകമെമ്പാടുമുള്ള തിയ്യേറ്ററുകളിലും എമ്പുരാൻ ആവേശത്തിലാഴ്ത്തി. വൻജനാവലിയാണ് തിയ്യേറ്ററുകളിൽ എത്തിക്കൊണ്ടിരിക്കുന്നത്.