‘സിദ്ദിഖ് തന്‍റെ സിനിമാ ജീവിതത്തിന്‍റെ തുടക്കത്തിന് കാരണക്കാരില്‍ ഒരാള്‍’- സായികുമാര്‍

സിദ്ദിഖ് തന്‍റെ സിനിമാ ജീവിതത്തിന്‍റെ തുടക്കത്തിന് കാരണക്കാരില്‍ ഒരാളെന്ന് സായികുമാര്‍. റാംജി റാവു സ്പീകിങ്ങിലെ തന്‍റെ കഥാപാത്രം അദ്ദേഹത്തിന്‍റെ സൃഷ്ടിയാണ്. അദ്ദേഹം പറഞ്ഞു തന്ന കാര്യങ്ങളാണ് ഞാന്‍ ചിത്രത്തില്‍ ചെയ്തത്. പറയാന്‍ വാക്കുകളില്ല. ഇത്രയും ഹൃദ്യനായ, പച്ചയായ മനുഷ്യന്‍ വേറെയില്ല. പറയുന്ന ഓരോ വാക്കും ഹൃദയത്തില്‍ നിന്നാണ്. അദ്ദേഹത്തെ ഒരുപാട് വിഷമിപ്പിച്ചിട്ടുണ്ട്, ഒരുപാട് പേര്‍. അവരുടെ ആരുടേയും പേര് ഇപ്പോള്‍ പറയുന്നില്ല. ഈ നിമിഷം അവരൊക്കെ മനസുകൊണ്ട് അദ്ദേഹത്തിന്‍റ ആത്മാവിനോട് ക്ഷമ ചോദിക്കട്ടെ. എന്നു മാത്രമേ പറയാനുള്ളൂ. എന്തു പ്രയാസമുണ്ടെങ്കിലും പുറത്തറിയിക്കാത്ത ആളാണ്. നമുക്ക് പ്രയാസം തോന്നുന്നത് എന്താണെന്ന് വച്ചാല്‍ ഇന്നസെന്‍റ് ചേട്ടന്‍, മാമുക്കോയ, ഇപ്പോള്‍ സിദ്ദിഖ് സാര്‍ എന്നിങ്ങനെ തോളോട് തോളുരുമ്മി നിന്നിരുന്നവരെല്ലാം ഇവിടം വിട്ടുപോയി. അവര്‍ ചെയ്തു വച്ച സൃഷ്ടികളില്‍ കൂടി അവരെ വീണ്ടും കാണാം. ഓര്‍മിക്കാം എന്നതൊഴിച്ചാല്‍ ഇനിയൊരു പുതിയ സംഭവം ആരംഭിക്കാന്‍ പറ്റില്ലല്ലോ. അദ്ദേഹത്തിന് ആത്മശാന്തി നേരുന്നു. ഇത് ഉള്‍ക്കൊള്ളാന്‍ അദ്ദേഹത്തിന്‍റെ കുടുംബത്തിന് ആര്‍ജവം കൊടുക്കട്ടെ എന്നു സായികുമാര്‍ പറഞ്ഞു.