കണ്ണൻ, ഉണ്ണി എന്നീ കുട്ടികളുടെ നിഷ്കളങ്ക ബാല്യത്തിന്റെയും സൌഹൃദത്തിന്റെയും കഥപറയുന്ന ചിത്രം ‘പല്ലൊട്ടി 90s കിഡ്സ്’ ന്റെ ടീസർ പുറത്തിറങ്ങി. ചിത്രം ഉടൻ ലോകം മുഴുവനുമുള്ള തിയ്യേറ്ററുകളിലേക്ക് പ്രദർശനത്തിന് എത്തും. 202- ജനുവരി 5 ന് ആണ് ചിത്രം റിലീസ് ചെയ്യുക. മികച്ച ബാലതാരം, മികച്ച കുട്ടികളുടെ ചിത്രം, മികച്ച പിന്നണി ഗായകൻ ഉൾപ്പെടെ മൂന്നു സംസ്ഥാന ചലച്ചിത്ര അവാർഡ് നേടിയ ചിത്രമാണ് ‘പല്ലൊട്ടി 90s കിഡ്സ്’. കൂടാതെ ഈ ചിത്രം ബാംഗ്ലൂർ ഇന്റർനാഷണൽ ഫിലിം ഫെസ്റ്റിവലിൽ ശ്രദ്ധ നേടുകയും 14 മത് ജെ സി ഡാനിയേൽ ഫൌണ്ടേഷൻ പുരസ്കാരവും ‘പല്ലൊട്ടി 90s കിഡ്സ്’ സ്വന്തമാക്കിയിട്ടുണ്ട്.
നവാഗതനായ ജിതിൻ രാജിന്റെ കഥയും സംവിധാനവുമാണ് ‘പല്ലൊട്ടി 90s കിഡ്സ്’. സിനിമാപ്രാന്തൻ ഫിലിം പ്രൊഡക്ഷൻസിന്റെ ബാനറിൽ നടനും സംവിധായകനുമായ സാജിദ് യാഹിയയും നിതിൻ രാധാകൃഷ്ണനും ആണ് ചിത്രം നിർമ്മിക്കുന്നത്. ചിത്രത്തിന്റെ അണിയറപ്രവർത്തകരെല്ലാം തുടക്കക്കാരാണ് എന്നതാണ് ‘പല്ലൊട്ടി 90s കിഡ്സ്’ ന്റെ മറ്റൊരു പ്രത്യേകത. മാസ്റ്റർ ഡാവിഞ്ചി സന്തോഷും മാസ്റ്റർ നീരജ് കൃഷ്ണയുമാണ് പ്രധാന കഥാപാത്രങ്ങൾ. കൂടാതെ അർജുൻ അശോകൻ, സുധി കോപ്പ, സൈജു കുറുപ്പ്, ദിനേശ് പ്രഭാകർ, ബാലു വർഗീസ്, നിരഞ്ജന അനൂപ്, തുടങ്ങിയവരും ചിത്രത്തിൽ വേഷമിടുന്നു.
