ജോജു ജോര്ജ്ജ്, ഐശ്വര്യ രാജേഷ്, ലിജോ മോള് പ്രധാന കഥാപാത്രങ്ങളായി എത്തുന്ന ചിത്രം ‘പുലിമട’യുടെ ടീസര് പുറത്തുവിട്ടു. ഒരു പാന് ഇന്ഡ്യന് ചിത്രമായി പുറത്തിറങ്ങുന്ന ചിത്രത്തിന്റെ ടീസര് പുറത്തുവിട്ടത് സുരേഷ് ഗോപി, ആസിഫ് അലി, ദിലീപ്, വിജയ് സേതുപതി തുടങ്ങിയ താരങ്ങളാണ്. ചിത്രത്തിന്റെ ഫസ്റ്റ് ലുക്ക് പോസ്റ്ററും ശ്രദ്ധേയമായിരുന്നു. ടീസറില് ജോജു ജോര്ജും ഐശ്വര്യ രാജേഷുമാണ് ഉള്ളത്. എ കെ സാജനാണ് ചിത്രത്തിന്റെ കഥയും തിരക്കഥയും സംവിധാനവും എഡിറ്റിങ്ങും.
ഐന്സ്റ്റീന് മീഡിയ, ലാന്ഡ് സിനിമാസ് ബാനറുകളില് സാക് പോള്, രാജേഷ് ദാമോദരന് എന്നിവര് ചേര്ന്ന് നിര്മ്മിക്കുന്ന ‘പുലിമട’യില് ബാലചന്ദ്ര മേനോന്, ജാഫര് ഇടുക്കി, സോന നായര്, ജോണി ആന്റണി, ജിയോ ബേബി, കൃഷ്ണ പ്രഭ, അബു സലീം, പൌളി വില്സണ്, ഷിബില, ചെമ്പന് വിനോദ്, തുടങ്ങിയവര് പ്രധാന കഥാപാത്രങ്ങളായി എത്തുന്നു. പോലീസ് കോണ്സ്റ്റബിളായ വിന്സന്റ് സ്കറിയ എന്ന കഥാപാത്രമായാണ് ജോജു ജോര്ജ്ജ് പുലിമടയില് എത്തുന്നത്. കല്യാണവും അതുമായി ബന്ധപ്പെട്ടു വരുന്ന സംഭവ വികാസങ്ങളും അയാളില് ഉണ്ടാക്കുന്ന മാറ്റങ്ങളുമാണ് സിനിമയില് പ്രമേയം. ഒരു ഷെഡ്യൂളില് 60 ദിവസം കൊണ്ട് ഷൂട്ടിംഗ് പൂര്ത്തിയാക്കിയ ബിഗ് ബജറ്റ് ചിത്രമാണ് പുലിമട. സംഗീതം- ഇഷാന് ദേവ്, പശ്ചാത്തല സംഗീതം അനില് ജോണ്സണ്.
