‘നീലക്കുയി’ലിലൂടെ ശ്രദ്ധേയ; ചലച്ചിത്ര പിന്നണി ഗായിക കോഴിക്കോട് പുഷ്പ അന്തരിച്ചു

പി. ഭാസ്കരൻ എഴുതി കെ. രാഘവൻ മാഷ് ഈണം പകർന്ന് 1954- ൽ പുറത്തിറങ്ങിയ നീലക്കുയിൽ എന്ന ചിത്രത്തിലെ ഗായിക കോഴിക്കോട് പുഷ്പ അന്തരിച്ചു.  84- വയസ്സായിരുന്നു. വ്യാഴായ്ച രാവിലെ ചെന്നൈ കൊട്ടിവാക്കത്തെ വീട്ടിൽ വെച്ചായിരുന്നു അന്ത്യം. നീലക്കുയിലിലെ ‘കടലാസ് വഞ്ചിയേറി കടലും കടന്ന് കേറി കളിയാടുമിളം കാറ്റിൽ ചെറുകാറ്റ് പായ പാറി..’എന്ന പാട്ടിലൂടെയാണ് കോഴിക്കോട് പുഷ്പ പ്രശസ്തയാകുന്നത്. ഈ ഗാനം ആലപിക്കുമ്പോൾ വെറും 14- വയസ്സായിരുന്നു പുഷ്പയ്ക്ക്. നീലക്കുയിലിന് മുൻപ് 1953- ൽ ലോകനീതി എന്ന ചിത്രത്തിൽ പാടിയെങ്കിലും അത് ശ്രദ്ധേയമായില്ല. അഭയദേവും ദക്ഷിണാമൂർത്തിയുമായിരുന്നു ഈ ചിത്രത്തിലെ വരികളും സംഗീതവും. കോഴിക്കോട് ആകാശവാണിയിലെ ലളിതഗാനം ആലപിച്ചു കൊണ്ട് ആണ് നീക്കുയിലിലൂടെ പുഷ്പ പി. ഭാസ്കരൻ മാഷുടെ ശ്രദ്ധയിൽ പെടുന്നത്. കോഴിക്കോട്  മാവൂർ റോഡിനടുത്ത് ആണ് ജനിച്ചതും വളർന്നതും. തലശ്ശേരിയിലാണ് പുഷ്പയുടെ തറവാട്. ഭർത്താവ്: പരേതനായ കെ വി സുകുരാജൻ, മക്കൾ: പരേതനായ പുഷ്പരാജ് വാചാലി, സൂര്യ, സൈറ. സംസ്കാരം വെള്ളിയാഴ്ച രാവിലെ പത്തിന് ചെന്നൈ ബസന്ത് നഗർ ശ്മശാനത്തിൽ.