ഷെബിന്‍ ബക്കര്‍ പ്രൊഡക്ഷന്‍സിന്‍റെ ബാനറില്‍ ഷെബിന്‍ ബക്കര്‍ നിര്‍മ്മിച്ച് അര്‍ജുന്‍ അശോകന്‍ നായകനായി എത്തുന്ന ചിത്രം തീപ്പൊരി ബെന്നിയുടെ സെക്കന്‍ഡ് ലുക്ക് പോസ്റ്റര്‍ പുറത്തിറക്കി. വെള്ളിമൂങ്ങ, ജോണി ജോണി യെസ് അപ്പാ എന്നീ ചിത്രങ്ങള്‍ക്കു തിരക്കഥ എഴുതിയ ജോജി തോമസും രാജേഷും ചേര്‍ന്നാണ് ചിത്രം സംവിധാനം ചെയ്യുന്നത്. ഒരു ഫാമിലി എന്‍റര്‍ടൈമെന്‍റ് ചിത്രമായ തീപ്പൊരി ബെന്നിയില്‍ രാഷ്ട്രീയമാണ് പ്രമേയം. അച്ഛന്‍റെ രാഷ്ട്രീയത്തെ എതിര്‍ക്കുന്ന മകനായി ആണ് അര്‍ജുന്‍ അശോകന്‍ എത്തുന്നത്. തികച്ചും വ്യത്യസ്ത കാഴ്ചപ്പാടുകളോട് കൂടി ജീവിക്കുന്ന അപ്പനെയും മകനെയും നര്‍മ്മത്തിലൂടെ അവതരിപ്പിക്കുകയാണ് ഈ ചിത്രത്തിലൂടെ.
ചിത്രത്തില്‍ ബെന്നിയായി അര്‍ജുന്‍ അശോകനും ബെന്നിയുടെ അച്ഛന്‍ വട്ടക്കൂട്ടായില്‍ ചേട്ടായിയായി ജഗദീഷും എത്തുന്നു. മിന്നല്‍ മുരളി എന്ന ചിത്രത്തിലൂടെ ശ്രദ്ധേയയായ ഫെമിനാ ജോര്‍ജ്ജാണ് നായിക. റാഫി, സന്തോഷ് കീഴാറ്റൂര്‍, ടി ജി രവി, പ്രേം പ്രകാശ്, ശ്രീകാന്ത് മുരളി, നിഷാ സാരംഗ് തുടങ്ങിയവര്‍ പ്രധാന കഥാപാത്രങ്ങളായി എത്തുന്നു. സംഗീതം ശ്രീരാഗ് സജിയും ഛായാഗ്രഹണം അജയ് ഫ്രാന്‍സിസ് ജോര്‍ജ്ജും എഡിറ്റിങ് സൂരജ് ഇ എസും കലാസംവിധാനം മിഥുന്‍ ചാലിശ്ശേരിയും നിര്‍വഹിക്കുന്നു.
