ഫെബ്രുവരി 22 ന് തിയ്യേറ്ററിലെത്തിയ മഞ്ഞുമ്മൽ ബോയ്സ് വിജയകരമായി പ്രദർശനം തുടരുകയാണ്. പറവ ഫിലിംസും ശ്രീ ഗോകുലം മൂവീസിന്റെയും ബാനറിൽ സൌബിൻ ഷാഹിർ, ഷോൺ ആൻറണി, ബാബു ഷാഹിർ എന്നിവരാണ് നിർമ്മിച്ചത്. മലയാളത്തിൽ മാത്രമല്ല, ഇതര ഭാഷകളിലും കയ്യടികൾ നേടുകയാണ് ഈ ചിത്രം. തമിഴ് നാട്ടിൽ മഞ്ഞുമ്മൽ ബോയ്സിനു മികച്ച പ്രതികരണമാണ് ലഭിക്കുന്നത്. ‘ഒരു ഇടവേളയ്ക്ക് ശേഷം ടിക്കറ്റുകൾക്ക് വേണ്ടി ഇത്രയും തിക്കിത്തിരക്കുന്ന പ്രേക്ഷകരെ തിയ്യേറ്ററുകളിൽ എത്തിച്ചതിന് നന്ദി’പറഞ്ഞു കൊണ്ട് തിരുനെൽവേലിയിലെ ‘റാം മുതുറാം സിനിമാസ്’ ഫേസ്ബുക്കിൽ കുറിച്ചു. 10 കോടിയിലധികം വരുമാനം ഇതിനോടകം തമിഴ് നാട്ടിൽ നിന്നുമാത്രമായി ചിത്രത്തിന് ലഭിച്ചു. തമിഴ്നാട്ടിൽ നിന്നും പത്തുകോടി രൂപ കളക്ഷൻ ലഭിക്കുന്ന ആദ്യ മലയാള സിനിമ കൂടിയാണ് മഞ്ഞുമ്മൽ ബോയ്സ്. തിയ്യേറ്ററുകളിലും ഓൺലൈൻ ബുക്കിങ്ങിലൂടെയും ഹൌസ്ഫുൾ ആവുകയാണ് തിയ്യേറ്ററുകളിൽ. കേരളത്തിലും ഇതരദേശങ്ങളിലുമടക്കം ഇതുവരെ മഞ്ഞുമ്മൽ ബോയ്സിന്റെ കളക്ഷൻ 75 കോടി കവിഞ്ഞിരിക്കുകയാണ്.
യഥാർത്ഥ സംഭവത്തെ അടിസ്ഥാനപ്പെടുത്തിക്കൊണ്ട് നിർമ്മിക്കപ്പെട്ട സിനിമ കൂടിയാണ് മഞ്ഞുമ്മൽ ബോയ്സ്. പറവ ഫിലിംസിന്റെ ബാനറിൽ ചിദംബരം തിരക്കഥ എഴുതി സംവിധാനം ചെയ്ത പുതിയ ചിത്രം തിയ്യേറ്ററിൽ വിജയക്കോടി പാറിച്ചു. ബിഗ്ബജറ്റിൽ ഒരുങ്ങിയ ചിത്രമാണ് ‘മഞ്ഞുമ്മൽ ബോയ്സ്’. ‘നടൻ സലീം കുമാറിന്റെ മകൻ ചന്ദുവും പ്രധാന കഥാപാത്രമായിഅഭിനയിച്ചിട്ടുണ്ട്. സൌബിൻ ഷാഹിർ, ഖാലിദ് റഹ്മാൻ, ബാലു വർഗീസ്, ശ്രീനാഥ് ഭാസി, അഭിറാം രാധാകൃഷ്ണൻ, ഗണപതി, വിഷ്ണു രഘു, അരുൺ കുര്യൻ, ലാൽ ജൂനിയർ, ദീപക് പറമ്പോൽ, തുടങ്ങിയവരാണ് ചിത്രത്തിലെ മറ്റ് പ്രധാന അഭിനേതാക്കൾ. എഡിറ്റിങ് വിവേക് ഹർഷൻ, സംഗീതം സുഷിൻ ശ്യാം.
