53- മത് കേരള സംസ്ഥാന ചലച്ചിത്ര അവാര്‍ഡില്‍ ‘ന്ന താന്‍ കേസ് കൊട്’ എന്ന ചിത്രത്തിലൂടെ മികച്ച നടനുള്ള സ്പെഷ്യല്‍ ജൂറി പുരസ്കാരം ലഭിച്ചതില്‍ സന്തോഷമെന്ന് കുഞ്ചാക്കോ ബോബന്‍. ‘സിനിമയെന്നത് ആഗ്രഹമേയല്ലാതിരുന്ന ഒരാളായിരുന്നു താന്‍. സിനിമയിലേക്ക് വരികയും പിന്നീട് ഇടവേള എടുക്കുകയും അതിനുശേഷം ആഗ്രഹിച്ചു സിനിമയിലേക്ക് വരികയും ചെയ്ത ആളാണ് ഞാന്‍. അവാര്‍ഡുകളും സിനിമയും സ്വപ്നത്തിലില്ലാതിരുന്ന ആ വ്യക്തി പിന്നീട് സിനിമകള്‍ മാത്രം സ്വപ്നങ്ങളിലുള്ള ഒരാളായി മാറുകയായിരുന്നു. ഒട്ടനവധി അവാര്‍ഡുകള്‍ ഈ സിനിമയ്ക്കു ലഭിക്കുന്നത് ചിത്രത്തിന്റെ സഹനിര്‍മാതാവ് കൂടിയായ തനിക്ക് സന്തോഷം നല്‍കുന്നതാണ്. മമ്മൂക്കയുടെ പേരിനൊപ്പം എന്ന് താന്‍ ഒരിക്കലും പറയില്ല. മമ്മൂക്കയുടെ പേരിനോട് ചേര്‍ന്ന് തന്‍റെ പേര് വന്നത് തന്നെ അവാര്‍ഡ് കിട്ടിയതിന് തുല്യമാണ്” കുഞ്ചാക്കോ പറഞ്ഞു.
‘ന്ന താന്‍ കേസ് കൊട് ‘എന്ന ചിത്രത്തിലൂടെ ലഭിച്ചതു 7 പുരസ്കാരങ്ങളാണ്. മികച്ച തിരക്കഥ, മികച്ച സ്വഭാവ നടന്‍, പശ്ചാത്തല സംഗീതം, കലാസംവിധാനം, ശബ്ദ മിശ്രണം എന്നീ മേഖലകളിലും ചിത്രത്തിന് പുരസ്കാരം ലഭിച്ചു.
