പുനർജ്ജനിയുടെ വിസ്മയത്തുമ്പത്ത് ‘മണിച്ചിത്രത്താഴ്’

മലയാളത്തിലെ എക്കാലത്തെയും ക്ലാസ്സിക്കൽ ഹൊറർ ചിത്രം മണിച്ചിത്രത്താഴ് വെള്ളിത്തിരയിൽ മുപ്പത് വർഷങ്ങൾക്ക് മുൻപത്തെ പ്രൌഡി നിലനിർത്തിക്കൊണ്ട് പുതിയ രൂപത്തിലും ഭാവത്തിലും അരങ്ങിലെത്തിയപ്പോൾ പ്രീമിയർ ഷോയിൽ ചിലങ്കയുടെ ഘനഗാംഭീര്യമായ ആ നാദം മുഴങ്ങി,കൂടെ അകമ്പടിയായി അതേ തമിഴ് പാട്ടും. പറഞ്ഞറിയിക്കാനാവാത്ത വിധം അതിസുന്ദരമായിരുന്നു ഡോൾബി അറ്റ്മോസിന്റെ ശബ്ദവിന്യാസത്തിലെ ഓരോരോ അണുകണങ്ങളും. കൊച്ചിയിലെ ഫോറം മാളിൽ വെച്ചായിരുന്നു പ്രീമിയർ ഷോ. മാന്ത്രികതനിറഞ്ഞ മാടമ്പള്ളിയിലെ തെക്കിനിയിൽ നിന്ന് നാഗവല്ലിയുടെ രംഗപ്രവേശം കൂടിയായപ്പോൾ കരഘോഷങ്ങൾ മുഴങ്ങി. ഇന്നിന്റെ ഏറ്റവും നവീനമായ ദൃശ്യ സാങ്കേതികവിദ്യയെ ഉപയോഗിച്ച് കൊണ്ട് പുനരുദ്ധാരണം ചെയ്ത മണിച്ചിത്രത്താഴിന്റെ കേരളത്തിലെ പ്രീമിയർ ഷോ കാണുവാൻ  ശ്രീദേവി എന്ന കഥാപാത്രത്തെ അവതരിപ്പിച്ച വിനയപ്രസാദും എത്തിയിരുന്നു. കൂടാതെ സംവിധായകനായ സിബി മലയിൽ, തിരക്കഥാകൃത്ത് എസ് എൻ സ്വാമി, നിർമ്മാതാക്കളായ ഷെർഗ, ഷെനൂഗ, സിയാദ് കോക്കർ, സന്ദീപ് സേനൻ തുടങ്ങിയവരും പങ്കെടുത്തു. ഓഗസ്ത് ഏഴിന് ചിത്രം തിയ്യേറ്ററുകളിൽ എത്തും.