‘നാമനിർദ്ദേശം ചെയ്യപ്പെട്ട  എല്ലാ സിനിമകളും കണ്ടിരിക്കണം’ പുതിയ നിയമവുമായി അക്കാദമി ഓഫ് മോഷൻ പിക്ചർ ആർട്സ് ആൻഡ് സയൻസസ്

ഓസ്കർ വോട്ടിങ് പ്രക്രിയയിൽ നാമനിർദ്ദേശം ചെയ്യപ്പെട്ട  എല്ലാ സിനിമകളും കണ്ടിരിക്കണമെന്ന് പുതിയ നിയമവുമായി അക്കാദമി ഓഫ് മോഷൻ പിക്ചർ ആർട്സ് ആൻഡ് സയൻസസ്. വോട്ടിങിന് മുൻപായി എല്ലാ വിഭാഗങ്ങളിൽ നിന്നും നോമിനേഷനിൽ വരുന്ന ചിത്രങ്ങൾ അക്കാദമി  അംഗങ്ങൾ നിർബന്ധമായും കണ്ടിരിക്കണമെന്നാണ് പുതിയ നിയമം. 98- മത് ഓസ്കർ പുരസ്കാര പ്രഖ്യാപത്തിന് മുന്നോടിയായാണ് പുതിയ നിയമം കൊണ്ടുവന്നിരിക്കുന്നത്. കഴിഞ്ഞ ദിവസമാണ് അധികൃതർ ഇക്കാര്യം പുറത്ത് വിട്ടത്. അക്കാദമി അംഗങ്ങൾ സിനിമ കാണാതെ അവാർഡ് നിർണ്ണയിക്കുന്നു, അർഹമായവയ്ക്ക് ലഭിക്കുന്നില്ല എന്നിങ്ങനെ വ്യാപകമായ പരാതിയെ തുടർന്നാണ് പുതിയ നിയമനടപടി. നോമിനേഷനുകൾക്കുള്ള വോട്ടിങ് കാലയളവ് 2026 ജനുവരി 12 മുതൽ ജനുവരി 16 വരെയാണ്. ഔദ്യോഗിക നോമിനികളെ ജനുവരി 22 നു പ്രഖ്യാപിക്കും. തുടർന്ന് ഫെബ്രുവരി 10- നു വാർഷിക ഓസ്കർ നോമിനീസ് ലഞ്ചിയൺ നടക്കും. ഓസ്കർ പുരസ്കാര ചടങ്ങ് 2026 മാർച്ച്- 15 നു നടക്കും.