നടിയും നർത്തകിയുമായ  ബേബി ഗിരിജ അന്തരിച്ചു

ജീവിത നൌക എന്ന ചിത്രത്തിലെ ‘ആനത്തലയോളം വെണ്ണതരാം..’ എന്ന പാട്ടു രംഗത്തിലഭിനയിച്ചു ശ്രദ്ധേയയായ നർത്തകിയും നടിയുമായ ബേബി ഗിരിജ എന്ന പി പി ഗിരിജ അന്തരിച്ചു. 83- വയസ്സായിരുന്നു. ശനിയാഴ്ച ചെന്നൈ അണ്ണാനഗറിലെ വീടിൽ വെച്ചായിരുന്നു അന്ത്യം. 1951 – പുറത്തിറങ്ങിയ ജീവിതനൌക എന്ന ചിത്രത്തിൽ നായികയായി എത്തിയ ബി എസ് സരോജയുടെ കുട്ടിക്കാലമായിരുന്നു ബേബി ഗിരിജ അവതരിപ്പിച്ചത്. പിന്നീട് വിശപ്പിന്റെ വിളി, അവൻ വരുന്നു, അച്ഛൻ, പുത്രധർമം, കിടപ്പാടം, പ്രേമലേഖ എന്നീ ചിത്രങ്ങളിൽ കഥാപാത്രമായി എത്തി. കണ്ണൂർ സ്വദേശികളായ അനന്തന്റെയും സുനീതിയുടെയും മകളാണ് ബേബി ഗിരിജ. ചെന്നൈലെ ഇന്ത്യൻ ഓവർസീസ്  ബാങ്കിൽ ഓഫീസറായി ജോലി ലഭിച്ചതോടെ അഭിനയരംഗം വിട്ടു. ഭർത്താവ് പരേതനായ ജയചന്ദ്രനും ഇന്ത്യൻ ബാങ്കിൽ ഓഫീസറായിരുന്നു. ഞായറാഴ്ച സംസ്കാരം നടക്കും. മക്കളില്ല.