മികച്ച ഗാനരചയിതാവിനുള്ള 53- മത് കേരള സംസ്ഥാന ചലച്ചിത്ര പുരസ്കാര നിറവിലാണ് റഫീഖ് അഹമ്മദ്. ‘പുരസ്കാരങ്ങള്‍ ലഭിക്കുന്നത് കൂടുതല്‍ മികച്ച രീതിയില്‍ പ്രവര്‍ത്തിക്കുവാന്‍ വേണ്ട ഉന്മേഷം പകരു’മെന്ന് മികച്ച ഗാനരചയിതാവിനുള്ള പുരസ്കാരം നേടിയ റഫീഖ് അഹമ്മദ് പറയുന്നു. ‘വിഡ്ഢികളുടെ മാഷ്’ എന്ന ചിത്രത്തിലെ “തിരമാലയാണ് നീ കാതലായ ഞാന്‍ നിന്നെ തിരയുന്നതെത്രമേല്‍ ശൂന്യം” എന്ന പാട്ടിനാണ് ഇത്തവണ അവാര്‍ഡ് കിട്ടിയിരിക്കുന്നത്. കെ എസ് ചിത്ര പാടി ബിജിബാല്‍ സംഗീതം പകര്‍ന്ന ഗാനമാണിത്. ആറാമത്തെ തവണയാണ് റഫീഖ് അഹമ്മദിനെ തേടി മികച്ച ഗാനരചയിതാവിനുള്ള കേരള സംസ്ഥാന ചലച്ചിത്ര പുരസ്കാരമെത്തുന്നത്.
‘ആറാമത്തെ തവണയാണ് എനിക്കു സംസ്ഥാന അവാര്‍ഡ് ലഭിക്കുന്നത്. അത് വലിയൊരു ബഹുമതിയായി കരുതുന്നു. ‘തിരമാലയാണ് നീ’ എന്നത് ഹിറ്റ് ചാര്‍ട്ടില്‍ വന്ന പാട്ട് ആയിരുന്നില്ല. കുറച്ചൊരു ഗൌരവ സ്വഭാവമുള്ള കാവ്യാത്മകമായ പാട്ടാണത്. ബിജിബാലിന്‍റേതാണ് ഈണം. അവാര്‍ഡുകള്‍ കിട്ടുന്നത് കൂടുതല്‍ മികച്ച രീതിയില്‍ പ്രവര്‍ത്തിക്കാനുള്ള ഊര്‍ജ്ജവും ഉന്മേഷവും തരുന്നുണ്ട്. അതോടൊപ്പം തന്നെ ശ്രോതാക്കളുടെ സ്നേഹവും പ്രോത്സാഹനവും വലിയ അംഗീകരമാണ്’ റഫീഖ് അഹമ്മദ് പറയുന്നു.
