സോജൻ ജോസഫ് സംവിധാനം ചെയ്ത് ഷൈൻ ടോം ചാക്കോ പ്രധാന കഥാപാത്രമായി എത്തുന്ന ചിത്രം ഒപ്പീസിലേക്ക് കന്നഡ- തെലുങ്ക് ചിത്രങ്ങളിലെ അഭിനേതാവായ ദീക്ഷിത് ഷെട്ടിയും ഒന്നിക്കുന്നു. ബോളിവുഡ് സിനിമകളിലും പരസ്യചിത്രങ്ങളിലും സജീവ സാന്നിദ്ധ്യമാണ് സോജൻ ജോസഫ്. മലയാളത്തിൽ ദീക്ഷിത് ഷെട്ടി ആദ്യമായി അഭിനയിക്കുന്ന ചിത്രം കൂടിയാണ് ഒപ്പീസ്. ദീക്ഷിത് ഷെട്ടിയും ഷൈൻ ടോം ചാക്കോയും ഇതിന് മുൻപ് ഒന്നിച്ചഭിനയിച്ച ചിത്രം ദസര ശ്രദ്ധേയമായിരുന്നു. ഇടവേളയ്ക്ക് ശേഷം ഇഷാ തൽവാർ മറ്റൊരു പ്രധാനകഥാപാത്രമായി എത്തുന്നു. സോളമന്റെ തേനീചകളിലൂടെ സിനിമയിലേക്ക് ചുവട് വെച്ച ദർശന നായരാണ് നായികയായി എത്തുന്നത്.
കോപ്പയിലെ കൊടുങ്കാറ്റ്, അലർട്ട് 24/7 എന്നീ ചിത്രങ്ങളാണ് സോജൻ ജോസഫ് സംവിധാനം ചെയ്തിട്ടുള്ളത്. സംഗീതത്തിന് പ്രാധാന്യമുള്ള ചിത്രത്തിൽ പ്രണയത്തിന്റെ വേറിട്ട ഭാവതലങ്ങളെയാണ് അവതരിപ്പിക്കുന്നത്. ആകർഷൻ എന്റർടൈമെന്റ് പ്രൈവറ്റ് ലിമിറ്റഡിന്റെ ബാനറിൽ പ്രദ്യുമന കോളേഗൽ ആണ് നിർമ്മാണം. സംഗീതം ജയചന്ദ്രൻ, വരികൾ റഫീഖ് അഹമ്മദ്, ബി കെ ഹരിനാരായണൻ, മനോജ് യാദവ്, ഛായാഗ്രഹണം സന്തോഷ് തുണ്ടിയിൽ, എഡിറ്റിങ് ശ്യാം ശശിധരൻ.
