വണ്ടര്ഫ്രെയിംസ് ഫിലിംലാന്ഡിന്റെ ബാനറില് ആദ്യമായി നിര്മ്മിക്കുന്ന ‘ജലധാര പമ്പ് സെറ്റ് സിന്സ് 1962’ എന്ന ചിത്രത്തില് ഉര്വശിയും, ഇന്ദ്രന്സും പ്രധാന കഥാപാത്രങ്ങളായി എത്തുന്നു. ബൈജു ചെല്ലമ്മ, സനിത ശശിധരന്, സാഗര്, തുടങ്ങിയവര് ചേര്ന്ന് നിര്മ്മിക്കുന്ന ഈ ചിത്രം ആഷിഷ് ചിന്നപ്പയാണ് സംവിധാനം ചെയ്യുന്നത്. സിനിമയില് അന്പത് വര്ഷം പൂര്ത്തിയാക്കുവാന് പോകുന്ന ടി ജി രവി ചിത്രത്തില് അഡ്വക്കേറ്റ് രവി എന്ന കഥാപാത്രമായി എത്തുന്നു. അരവിന്ദന്റെ ‘ഉത്തരായണ’ത്തിലൂടെ 1975- ലാണ് ഇദ്ദേഹം അഭിനയ രംഗത്തേക്ക് കടന്നു വരുന്നത്. മിക്ക സിനിമകളിലും നിരവധി വില്ലന് കഥാപാത്രങ്ങളിലൂടെ അദ്ദേഹം ശ്രദ്ധിക്കപ്പെട്ടു. ഈനാട്, പറങ്കിമല, പാവം ക്രൂരന്, പത്താമുദയം, ചാകര, തുടങ്ങിയ ചിത്രങ്ങളില് ഇദ്ദേഹം അഭിനയിച്ച കഥാപാത്രങ്ങള് മികച്ചവയായിരുന്നു.
‘ജലധാര പമ്പ് സെറ്റ് സിന്സ് 1962’ എന്ന ചിത്രത്തിലെ അഡ്വക്കേറ്റ് രവി എന്ന കഥാപാത്രവും ശക്തമാണെന്നു അണിയറ പ്രവര്ത്തകര്. ചിത്രത്തിന്റെ ഷൂട്ടിങ്ങ് പാലക്കാട് വെച്ച് നടന്നു. സാഗര്, ടി ജി രവി, കലാഭവന് ഹനീഫ്, തങ്കച്ചന് വിതുര, ശൈലജ അമ്പു, വിഷ്ണു ഗോവിന്ദന്, ശിവജി ഗുരുവായൂര്, അല്ത്താഫ്, വിജയരാഘവന്, സനുഷ, നിഷ സാരംഗ്, അഞ്ജലി സുനില്കുമാര്, സ്നേഹ ബാബു, നിത കര്മ്മ, സജി ചെറുകയില്, ജയന് ചേര്ത്തല, തുടങ്ങിയവരാണ് ചിത്രത്തിലെ മറ്റ് അഭിനേതാക്കള്.
