അത്രമാത്രം ആത്മബന്ധമുള്ള വ്യക്തി; സിദ്ദിഖിനെ അനുസ്മരിച്ച് മുകേഷ്

തനിക്ക് വളരെയേറെ ആത്മബന്ധമുണ്ടായിരുന്ന വ്യക്തിയെന്ന് സിദ്ദിഖിനെ അനുസ്മരിച്ച് നടന്‍ മുകേഷ്. “ജീവിതത്തിൽ മദ്യപിക്കുകയോ സി​ഗരറ്റ് വലിക്കുകയോ ചെയ്യാത്ത ആളായിരുന്നു. കരൾ മാറ്റിവെച്ചാൽ മതി, അത് ആ ആശുപത്രിയിൽത്തന്നെ ചെയ്യാം. ബാക്കി എല്ലാം ഓ.കെ ആണ് എന്നുപറഞ്ഞിരിക്കുമ്പോഴാണ് രണ്ടു ദിവസം മുമ്പ് ഹൃദയാഘാതം സംഭവിക്കുന്നത്. എന്നാലും തിരിച്ചുവരുമെന്നൊരു പ്രതീക്ഷയുണ്ടായിരുന്നു. പക്ഷേ ഇത് ക്രൂരമായ മരണമായിപ്പോയി എന്നുതന്നെ വേണമെങ്കിൽ പറയാം. കാരണം അത്രമാത്രം ആത്മബന്ധമുള്ള ഒരാളായിരുന്നു സംവിധായകൻ സിദ്ദിഖ്. 1982-ലും മറ്റും ഞാനും എന്‍റെ പ്രായക്കാരായ കുറച്ചുപേരും സിനിമയിൽ നായകന്മാരായ ശേഷവും മറ്റു വേഷങ്ങൾ ചെയ്തിരുന്നു. സൂപ്പർതാരങ്ങളുടെ അയൽവാസിയോ സുഹൃത്തോ ഒക്കെയായി സിനിമാജീവിതം അവസാനിക്കും എന്ന് കരുതിയിരുന്നു.