ജിത്തു ജോസഫും ബേസിലും ഒന്നിക്കുന്ന ചിത്രം നുണക്കുഴിയുടെ ഷൂട്ടിംഗ് ആരംഭിച്ചു. ചിത്രത്തിന്റെ പൂജ വെണ്ണല ലിസ്സി ഫാർമസി കോളേജിൽ വെച്ച് നടന്നു. നുണക്കുഴിയുടെ ടൈറ്റിൽ ലുക്ക് പോസ്റ്റർ ഇതിനോടകം ആളുകൾ ഏറ്റെടുത്ത് കഴിഞ്ഞിരുന്നു. കെ ആർ കൃഷ്ണകുമാർ ആണ് ചിത്രത്തിന് തിരക്കഥ ഒരുക്കുന്നത്. കൂമൻ എന്ന ചിത്രത്തിന് ശേഷം കൃഷ്ണകുമാറും ജിത്തു ജോസഫും ഒന്നിക്കുന്ന ചിത്രം കൂടിയാണ് നുണക്കുഴി. സരിഗമയും ജിത്തു ജോസഫിന്റെ ബെഡ് ടൈം സ്റ്റോറീസും ചേർന്നൊരുക്കുന്ന ചിത്രമാണ് നുണക്കുഴി.
വിക്രം മെഹർ, സിദ്ധാർഥ ആനന്ദ് എന്നിവർ ചേർന്നാണ് നിർമാണം. ഗ്രേസ് ആൻറണിയും ചിത്രത്തിൽ മറ്റൊരു പ്രധാന കഥാപാത്രമായി എത്തുന്നു. സിദ്ദിഖ്, ബൈജു, ബിനു പപ്പു, പ്രമോദ് വെളിയനാട്, സൈജു കുറുപ്പ്, അജു വർഗീസ്, മനോജ് കെ ജയൻ, തുടങ്ങിയവരും ചിത്രത്തിൽ മറ്റ് കഥാപാത്രങ്ങളായി എത്തുന്നു. ഛായാഗ്രഹണം സതീഷ് കുറുപ്പ്, എഡിറ്റിങ് വിനായക് വി എസ്.
