തനിക്ക് ഏറ്റവും പ്രിയങ്കരനായ ഹോളിവുഡ് താരം അര്‍നോള്‍ഡ് ശിവശങ്കരന്‍റെ പേരിലുള്ള ചിത്രത്തില്‍ നായകനായി എത്തുന്നതിന്‍റെ ത്രില്ലിലാണ് നടന്‍ അബു സലീം. നിരവധി സിനിമകളില്‍ വില്ലനായും കൊമേഡിയനായും മലയാളികള്‍ക്കിടയില്‍ സുപരിചിതനാണ് ഇദ്ദേഹം. സിനിമാ ജീവിതത്തില്‍ നാലര പതിറ്റാണ്ടു പിന്നിടുന്ന അറുപത്തിയെഴാം വയസ്സിലാണ് നായക വേഷത്തില്‍ അഭിനയിക്കുവാനുള്ള അവസരം അബു സലീമിനെ തേടി എത്തുന്നത്.
എ കെ സാജന്‍ സംവിധാനം ചെയ്യുന്ന ചിത്രത്തില്‍ മാധ്യമപ്രവര്‍ത്തകന്‍ ശരത് കൃഷ്ണയുടേതാണ് തിരക്കഥ. ചിത്രത്തില്‍ ലുക് മാനും പ്രധാന വേഷത്തില്‍ എത്തുന്നുണ്ട്. പോലീസ് ഉദ്യോഗസ്ഥനായിരുന്ന അബു സലീം 2012- ലാണ് ജോലിയില്‍ നിന്നും വിരമിച്ചത്. 1978- ല്‍ രാജന്‍ പറഞ്ഞ കഥ എന്ന ചിത്രത്തിലൂടെ സിനിമയിലേക്ക് അരങ്ങേറ്റം കുറിച്ച അബുസലിം മലയാളമടക്കം നിരവധി ഇന്ത്യന്‍ ഭാഷകളില്‍ അഭിനയിച്ചിട്ടുണ്ട്. 1982-ല്‍ മിസ്റ്റര്‍ കേരളയും 1983,86,87, കാലങ്ങളില്‍ മിസ്റ്റര്‍ സൌത്ത് ഇന്ത്യയുമായി അബു സലീം തിരഞ്ഞെടുക്കപ്പെട്ടിട്ടുണ്ട്.
