‘ഇതുവരെ ചെയ്തതില്‍ നിന്നും കുറച്ചൊന്നു മാറി ചെയ്ത സിനിമയാണ് അറിയിപ്പ്. ആ സിനിമ അംഗീകരിക്കപ്പെട്ടതില്‍ സന്തോഷം ഉണ്ട്. പലരാജ്യാന്തര മേളകളിലും തെരഞ്ഞെടുത്ത സിനിമയാണ്, പുരസ്കാരം ലഭിക്കുമെന്ന് കരുതിയില്ല. സിനിമയില്‍ പങ്കാളികളായ എല്ലാവരോടും നന്ദി പറയുന്നു’. 53-മത് കേരള സംസ്ഥാന ചലച്ചിത്ര പുരസ്കാരത്തില്‍ ‘അറിയിപ്പ്’ എന്ന ചിത്രത്തിലൂടെയാണ് മഹേഷ് നാരായണന്‍ മികച്ച സംവിധായകനായി തിരഞ്ഞെടുക്കപ്പെട്ടത്.
സംവിധായകനും എഡിറ്ററും ഛായാഗ്രാഹകനും തിരക്കഥാകൃത്തുമാണ് മഹേഷ് നാരായണന്‍. 2017- ല്‍ ഇദ്ദേഹത്തിനു മികച്ച നവാഗത സംവിധായകനുള്ള കേരള സംസ്ഥാന ചലച്ചിത്ര അവാര്‍ഡ് ലഭിച്ചിട്ടുണ്ട്. ടേക്ക് ഓഫ് എന്ന ഒറ്റ ചിത്രംകൊണ്ട് തന്നെ ചലച്ചിത്ര ലോകത്ത് തരംഗം സൃഷ്ടിച്ചെടുക്കാന്‍ ഇദ്ദേഹത്തിനു കഴിഞ്ഞു.
