മലയാള സിനിമയുടെ ഒരുകാലത്ത് പോലീസ് വേഷങ്ങളില്‍ എത്തി കിടിലന്‍ ഡയലോഗുകള്‍ കൊണ്ട് വെള്ളിത്തിരയെ ത്രസിപ്പിച്ച വാണി വിശ്വനാഥ് നീണ്ട പത്തുവര്‍ഷത്തെ ഇടവേളയ്ക്ക് ശേഷം വീണ്ടും സിനിമയിലേക്ക്. നവാഗതനായ ജോ ജോര്‍ജ്ജ് സംവിധാനം ചെയ്യുന്ന ചിത്രത്തില്‍ പ്രധാന കഥാപാത്രമായാണ് വാണി വിശ്വനാഥ് എത്തുന്നത്. ലിറ്റില്‍ ക്രൂ പ്രൊഡക്ഷന്‍സിന്‍റെ ബാനറില്‍ ഫൈസല്‍ രാജ നിര്‍മ്മിക്കുന്ന ചിത്രത്തില്‍ സൈജു കുറുപ്പ്, ശ്രീനാഥ് ഭാസി, ലാല്‍ തുടങ്ങിയവരും അഭിനയിക്കുന്നുണ്ട്.
ആഗസ്ത് രണ്ട് ബുധനാഴ്ച സിനിമയുടെ സ്വിച്ച് ഓണ്‍ കര്‍മ്മം ലാല്‍ ഉത്ഘാടനം ചെയ്തു. മാമന്നന്‍ എന്ന ഹിറ്റ് ചിത്രത്തിലെ നായികയും ഡബ്ബിങ് ആര്‍ട്ടിസ്റ്റ് ശ്രീജ രവിയുടെ മകളുമായ രവീണ രവിയാണ് ഈ ചിത്രത്തിലും നായികയായി എത്തുന്നത്. തന്‍റെ അഭിനയ ജീവിതത്തിലെ അമ്പതാമത്തെ ചിത്രമാണിതെന്ന് ശ്രീനാഥ് ഭാസി പറഞ്ഞു. വികാ, സാന്ത്യം മാത്രമേ ബോധിപ്പിക്കൂ, കൂമ്പാരീസ്, തുടങ്ങിയ ചിത്രത്തിന്റെ സംവിധായകനായ സാഗറാണ് ചിത്രത്തിന് തിരക്കഥ എഴുതുന്നത്.
ടി ജി രവി, അബിന്‍ ബിനോ, ബോബന്‍ സാമുവല്‍, സാബു ആമി, രാജേഷ് ശര്‍മ്മ, ജിലൂ ജോസഫ്, അഭിറാം, ആന്‍റണി ഏലൂര്‍, തുടങ്ങിയവരും ചിത്രത്തില്‍ പ്രധാന കഥാപാത്രങ്ങളായി എത്തുന്നു. ഹരിനാരായനന്‍റെ വരികള്‍ക്ക് വരുണ്‍ ഉണ്ണി സംഗീതം പകരുന്നു. എഡിറ്റിങ് നൌഫല്‍ അബ്ദുള്ളയും ഛായാഗ്രഹണം സനീഷ് സ്റ്റാന്‍ലിയും കലാസംവിധാനം സഹസ് ബാലയും നിര്‍വഹിക്കും. ചിത്രത്തിന്റെ ഷൂട്ടിങ്ങ് കൊച്ചിയില്‍ ആരംഭിച്ചു.
