ഉണ്ണി മുകുന്ദനെ നായകനാക്കി രഞ്ജിത് ശങ്കർ എഴുതി സംവിധാനം ചെയ്യുന്ന ഏറ്റവും പുതിയ ചിത്രം ജയ് ഗണേഷിലെ ത്രില്ലിംഗ് ട്രയിലർ പുറത്തിറങ്ങി. മാളികപുറത്തിന് ശേഷം ഉണ്ണി മുകുന്ദൻ അഭിനയിക്കുന്ന ചിത്രമാണ് ജയ് ഗണേഷ്. നീണ്ട ഇടവേളയ്ക്ക് ശേഷം ജോമോൾ സിനിമയിലേക്ക് തിരിച്ചുവരുന്ന ചിത്രം കൂടിയാണ് ജയ് ഗണേഷ്. ചിത്രത്തിൽ ഒരു ക്രിമിനൽ വക്കീലിന്റെ വേഷത്തിലാണു ജോമോൾ എത്തുക. മഹിമ നമ്പ്യാരാണ് ചിത്രത്തിലെ നായിക.
ഒരു വടക്കൻ വീരഗാഥ എന്ന ചിത്രത്തിലൂടെ ഉണ്ണിയാർച്ചയുടെ ബാല്യകാലം അഭിനയിച്ചു കൊണ്ട് സിനിമയിലേക്ക് രംഗപ്രവേശം ചെയ്ത ജോമോൾ സ്നേഹം, എന്ന് സ്വന്തം ജാനകിക്കുട്ടി, പഞ്ചാബി ഹൌസ്, മയിൽപ്പീലിക്കാവ്, നിറം, ദീപസ്തംഭം മഹാശ്ചര്യം, ചിത്രശലഭം തുടങ്ങിയ സിനിമകളിൽ മികച്ച വേഷങ്ങൾ ചെയ്തു. രഞ്ജിത് ശങ്കറും ഉണ്ണി മുകുന്ദനും ചേർന്ന് നിർമ്മിക്കുന്ന ചിത്രമാണിത്. രവീന്ദ്ര വിജയ്, മഹിമ നമ്പ്യാർ തുടങ്ങിയവരാണ് ചിത്രത്തിലെ മറ്റ് പ്രധാന അഭിനേതാക്കൾ.
