ടൊവിനോ തോമസും കൃതി ഷെട്ടിയും ഒന്നിക്കുന്ന ഫാന്റസി ചിത്രം ‘എ ആര് എമ്മി’ലെ ക്യാരക്ടര് പോസ്റ്റര് പുറത്തിറങ്ങി. കൃതി ഷെട്ടിയുടെ ലക്ഷ്മി എന്ന കഥാപാത്രത്തിന്റെ ക്യാരക്ടര് പോസ്റ്ററാണ് റിലീസ് ചെയ്തിരിക്കുന്നത്. സിനിമ ചരിത്രത്തിലെ തന്നെ ഏറ്റവും വലിയ ബജറ്റില് ഒരുങ്ങുന്ന ചിത്രമാണ് എ ആര് എമ്മെന്നു ലഭിച്ചിരിക്കുന്ന സൂചന. പൂര്ണമായും 3 ഡിയില് ഒരുങ്ങുന്ന ചിത്രം കൂടിയാണിതെന്ന സവിശേഷതയുണ്ട്. മുന്പ് പുറത്തിറങ്ങിയ ചിത്രത്തിന്റെ ടീസര് വളരെയേറെ ശ്രദ്ധിക്കപ്പെട്ടിരുന്നു. ട്രിപ്പിള് റോളില് ടോവിനോ ചിത്രത്തില് എത്തുന്നതാണ് ‘എ ആര് എമ്മി’ലെ മറ്റൊരു സവിശേഷത. ജിതിന് ലാല സംവിധാനം ചെയ്യുന്ന ചിത്രത്തില് കൃതി ഷെട്ടിയും ഐശ്വര്യ രാജേഷും സുരഭി ലക്ഷ്മിയും നായികമാരായി എത്തുന്നു.
അജയന്റെ രണ്ടാം മോഷണം എന്ന ചുരുക്ക പേരാണ് ‘എ ആര് എം’. കൃതി ഷെട്ടി ആദ്യമായി മലയാളത്തില് അഭിനയിക്കുന്ന ചിത്രമാണ് എ ആര് എം. പാന് ഇന്ത്യന് ചിത്രമായ എ ആര് എം അഞ്ച് ഭാഷകളിലായി പുറത്തിറങ്ങും. മാജിക് ഫ്രെയിംസ്, യു ജി എം മോഷന് പിക്ചേഴ്സ് എന്നീ ബാനറുകളില് ലിസ്റ്റിന് സ്റ്റീഫനും ഡോ സക്കറിയ തോമസും ചേര്ന്നാണ് ചിത്രം നിര്മ്മിക്കുന്നത്. സുജിത് നമ്പ്യാരുടേതാണ് തിരക്കഥ. ബേസില് ജോസഫ്, ജഗദീഷ്, ഹരീഷ് പേരടി, പ്രമോദ് ഷെട്ടി, ഹരീഷ് ഉത്തമന്, രോഹിണി തുടങ്ങിയ താരങ്ങളും ചിത്രത്തില് അണിനിരക്കുന്നു. സംഗീതം ദിനു നൈനാന്, ഛായാഗ്രഹണം ജോമോന് ടി ജോണ്, എഡിറ്റര് ഷമീര് മുഹമ്മദ്.
