മഹാമാന്ത്രികനായ കടമറ്റത്ത് കത്തനാരുടെ ജീവിത കഥപറയുന്ന ചിത്രത്തില്‍ കത്തനാരായി ജയസൂര്യ എത്തുന്നു. ഐതിഹ്യകഥകളിലൂടെയും മറ്റും ഇടം നേടിയ മാന്ത്രികനാണ് കടമറ്റത്ത് കത്തനാര്‍. ‘കത്തനാര്‍; ദി വൈല്‍ഡ് സോര്‍സറര്‍’ എന്ന ബിഗ് ബജറ്റ് ചിത്രത്തിന്റെ ഗ്ലിംസ് വീഡിയോ പുറത്തിറങ്ങി. ജോ ആന്ഡ് ദ ബോയ്, ഹോം, ഫിലിപ്സ് ആന്ഡ് ദ മങ്കി പെന്‍, എന്നീ ചിത്രങ്ങളുടെ സംവിധായകന്‍ രോജിന്‍ തോമസ് സംവിധാനം ചെയ്യുന്ന ചിത്രമാണിത്.
തെന്നിന്ത്യന്‍ സൂപ്പര്‍ താരം അനുഷ്കയാണ് ചിത്രത്തിലെ നായിക. അനുഷ്ക ആദ്യമായി മലയാളത്തില്‍ അഭിനയിക്കുന്ന ചിത്രം കൂടിയാണിത്. ഫാന്‍റസിയും ആക്ഷനും ത്രില്ലറും നിറഞ്ഞ വീഡിയോ പ്രേക്ഷകര്‍ ഏറ്റെടുത്തു കഴിഞ്ഞു. വെര്‍ച്വല്‍ പ്രൊഡക്ഷന്‍ ടെക്നോളജിയുടെ സ്വാധീനമുപയോഗിക്കുന്ന ആദ്യ ഇന്ത്യന്‍ സിനിമ കൂടിയാണിത്. ചെന്നൈ, റോം തുടങ്ങിയ ഇടങ്ങളില്‍ ചിത്രീകരണം നടന്നു കൊണ്ടിരിക്കുന്നു.
മലയാളം, ഹിന്ദി, തമിഴ്, തെലുങ്ക്, ചൈനീസ്, ഫ്രഞ്ച്, ഇംഗ്ലിഷ്, ബംഗാളി, കൊറിയന്‍, റഷ്യന്‍, ഇന്തോനേഷ്യന്‍, ജാപ്പനീസ്, ജര്‍മന്‍ തുടങ്ങിയ ഭാഷകളിലാണ് ചിത്രം പ്രദര്‍ശനത്തിന് എത്തുക. ചിത്രത്തിന്റെ ഒന്നാം ഭാഗം 2024- ല്‍ തിയ്യേറ്ററുകളില്‍ എത്തും. ശ്രീ ഗോകുലം മൂവീസിന്‍റെ ബാനറില്‍ ഗോകുലം ഗോപാലനാണ് ചിത്രം നിര്‍മ്മിക്കുന്നത്. തിരക്കഥ ആര്‍ രാമാനന്ദ്. ക്യാമറ നീല്‍ ഡിക്കൂഞ്ഞ്. സംഗീതം രാഹുല്‍ സുബ്രഹ്മണ്യം.
