ബിജു മേനോനും സുരാജ് വെഞ്ഞാറമ്മൂടും പ്രധാനകഥാപാത്രങ്ങളായി എത്തുന്ന ചിത്രം നടന്ന സംഭവത്തിന്റെ ഏറ്റവും പുതിയ ടീസർ പുറത്തിറങ്ങി. ചിത്രം ജൂൺ 21 ന് തിയ്യേറ്ററുകളിൽ പ്രദർശനത്തിന് എത്തും. ചിരിയുടെ പൂരവുമായി സുരാജും ബിജു മേനോനും ഒന്നിക്കുന്ന ഫൺ ഫാമിലി ഡ്രാമ മൂവിയായിരിക്കും ‘നടന്ന സംഭവം’. മറഡോണ എന്ന ചിത്രത്തിന് ശേഷം വിഷ്ണു നാരായണൻ സംവിധാനം ചെയ്യുന്ന ചിത്രമാണ് നടന്ന സംഭവം. സ്റ്റോറീസിന്റെ ബാനറിൽ അനൂപ് കണ്ണനാണ് നിർമ്മാണം. ഉണ്ണി എന്ന കഥാപാത്രമായി ബിജു മേനോനും അജിത്ത് എന്ന കഥാപാത്രമായി സുരാജും എത്തുന്നു. നഗരത്തിലെ ഒരു വില്ല കമ്മ്യൂണിറ്റിക്ക് അകത്ത് നടക്കുന്ന കഥയാണ് പ്രമേയം.
രാജേഷ് ഗോപിനാഥിന്റെതാണ് തിരക്കഥ. ചിത്രത്തില് സുധി കോപ്പ, ശ്രുതി രാമചന്ദ്രൻ, ലിജോ മോൾ, ലാലു അലക്സ്, നൌഷാദ് അലി, എയ്തൾ അവ്ന ഷെറിൻ, ആതിര ഹരികുമാർ, ജോണി ആൻറണി, അനഘ അശോക്, ശ്രീജിത്ത് നായർ, ജെസ് സുജൻ, തുടങ്ങിയവരും അഭിനയിക്കുന്നുണ്ട്. ഛായാഗ്രഹണം മനീഷ് മാധവൻ, സംഗീതം അങ്കിത് മേനോൻ, ഗാനരചന സുഹൈൽ കോയ, എഡിറ്റിങ് സൈജു ശ്രീധരൻ.
