ലിജോ ജോസ് പല്ലിശ്ശേരിയുടെ സംവിധാനത്തിൽ പുറത്തിറങ്ങിയ അങ്കമാലി ഡയറീസ് എന്ന ചിത്രത്തിൽ യൂക്ലാബ് രാജൻ എന്ന കഥാപാത്രത്തിലൂടെ ശ്രദ്ധേയനായ ടിറ്റോ വിൽസൺ നായകനായി എത്തുന്ന ‘സംഭവം ആരംഭം’ എന്ന ചിത്രത്തിന്റെ ടീസർ റിലീസായി. ടീം വട്ടം പ്രൊഡക്ഷൻസിന്റെ ബാനറിൽ നിഷാദ് ഹസ്സനാണ് തിരക്കഥയെഴുതി സംവിധാനം ചെയ്തത്. ഹെവി ഡോസ് എന്ന കഥാപാത്രമായാണ് ടിറ്റോ വിൽസൺ എത്തുന്നത്. സ്വന്തം സുഖത്തിനും സന്തോഷത്തിനും വേണ്ടി മറ്റുള്ളവരുടെ ഏത് വിധേനെയും ഉപയോഗിക്കുന്ന രീതിയാണ് ഈ കഥാപാത്രത്തിന്റെ പ്രത്യേകത.
മുരുകൻ മാർട്ടിൻ, മെക്സിക്കൻ അപാരതയുടെ ഡയറക്ടർ ടോം ഇമ്മട്ടി, ലിജോ അഗസ്റ്റിൻ, ഇസ്മയിൽ കാലിക്കറ്റ്, ചാർലി ജോ, രണദിവേ, ഉണ്ണികൃഷ്ണൻ, ഉമേഷ് ഉദയകുമാർ, പ്രശാന്ത് മുരളി, തുടങ്ങിയവരാണ് പ്രധാന കഥാപാത്രങ്ങളായി എത്തുന്നത്. രണ്ട് മണിക്കൂർ സിംഗിൾ ഷോട്ടിൽ ചിത്രീകരിച്ച് വേൾഡ് റെക്കോർഡ് നേടിയ ആദ്യ ചിത്രം ‘വിപ്ലവം ജയിക്കാനുള്ളതാണ്’ എന്ന ചിത്രത്തിന്റെയും ലോകത്തിലെ ആദ്യ തത്സമയ ഹ്രസ്വചിത്രമായ ‘വട്ടം’ എന്ന ചിത്രത്തിന്റെയും സംവിധായകനാണ് നിഷാദ് ഹസ്സൻ. ഛായാഗ്രഹണം റെജിൻ സാന്റോ, വരികൾ ഡിനു മോഹൻ, അസ്സി മൊയ്തു, നിഷാദ് ഹസ്സൻ, സംഗീതം വിനായക് ശരത് ചന്ദ്രൻ, എഡിറ്റിങ് ജിതിൻ.
