വിഷ്ണു ഉണ്ണികൃഷ്ണനെ പ്രധാനകഥാപാത്രമാക്കിക്കൊണ്ട് ദേശീയ ചലച്ചിത്ര അവാർഡ് ജേതാവ് വി സി അഭിലാഷ് സംവിധാനം ചെയ്യുന്ന പുതിയ ചിത്രം ‘എ പാനൽ ഇന്ത്യൻ സ്റ്റോറി’യുടെ മോഷൻ പോസ്റ്റർ പുറത്തിറങ്ങി. അമേരിക്കൻ മലയാളി ചലച്ചിത്ര നിർമ്മാണ കമ്പനി ‘നല്ല പ്രൊഡക്ഷൻസിന്റെ ബാനറിൽ നിർമ്മിക്കുന്ന ആദ്യ ചിത്രം കൂടിയാണ് ‘എ പാൻ ഇന്ത്യൻ സ്റ്റോറി’. അമേരിക്കൻ മലയാളിയായ ഫഹദ് സിദ്ദിഖ് ആണ് ചിത്രത്തിന്റെ നിർമ്മാണം. രണ്ട് കുടുംബങ്ങളുടെ കഥപറയുന്ന പശ്ചാത്തലമാണ് എ പാൻ ഇന്ത്യൻ സ്റ്റോറി.
ഇന്ദ്രൻസിന് മികച്ച നടനുള്ള സംസ്ഥാന അവാർഡ് നേടിക്കൊടുത്ത ‘ആളൊരുക്ക’ത്തിന്റെ സംവിധായകൻ കൂടിയാണ് വി സി അഭിലാഷ്. വിഷ്ണു ഉണ്ണികൃഷ്ണൻ തന്നെ നായകനായി എത്തി അഭിലാഷ് സംവിധാനം ചെയ്ത സബാഷ് ചന്ദ്രബോസും ഏറെ ശ്രദ്ധിക്കപ്പെട്ടിരുന്നു. ആഫ്രിക്കൻ ഇന്റർനാഷണൽ ഫിലിം ഫേസ്സ്റ്റിവലിൽ തിരഞ്ഞെടുക്കപ്പെട്ട ആദ്യ ഇന്ത്യൻ ചലച്ചിത്രം കൂടിയാണ് സബാഷ് ചന്ദ്രബോസ്. പുതുമുഖമായ വിസ്മയ ശശികുമാർ നായികയായി എത്തുന്നു. ധർമ്മജൻ ബോൾഗാട്ടി, ഋതുപർണ്ണ, വിജയനുണ്ണി, രമ്യ സുരേഷ്, ശൈലജ അമ്പു, ഡാവിഞ്ചി, ഡോ: ഷിറിൽ തുടങ്ങിയവർ ചിത്രത്തിൽ അണിനിരക്കുന്നു.
